Oinarrizkoak
Teleskopioak, unibertsoaren mugak gertuago
Teleskopioak etengabe ari dira hobetzen. Zentzu horretan aurtengo nobedadea Txileko Vera Rubin Behatokia da; izan ere, dagoeneko hasi da unibertso zabalaren irudi ikusgarriak jasotzen. Teleskopio horren eraikuntzan eta garapenean Eibarko Tekniker zentro teknologikoak parte hartu du. Besteak beste, biki digital bat dute eta esan daiteke begi bat Txilen dutela egunero.
Gaizka Murga ingeniariak IDOM enpresan Astronomia eta Espazioaren arloa zuzentzen du. Vera Rubin behatokiaz hitz egin dugu berarekin, teknologiaren aurrerapenaz eta baita 2029rako bukatua egotea espero duten ELT teleskopioari buruz ere.
ELT edo Teleskopio Izugarri Handia eraikitzeko fasean dago Europako Behatoki Australa Txilen, Atacamako basamortuan. 40 metroko ispilua izango duenez, inoiz eraiki den teleskopiorik handiena izango da. Badira Euskal Herrian proiektu honetan lanean ari diren enpresak. Horietako bat IDOM da; ELT behatokirako bi sistema garrantzitsu garatu eta fabrikatu ditu.
Teleskopioak espazioari buruz edo Fisikaz ikasteko tresnak ere badira. Mondragon Unibertsitateko Industriari Aplikatutako Ingeniaritza Fisikoko ikasleek fisikaren oinarriak ikasteko erabiltzen dituzte. Bilboko zeruari begiratzeko asmoz egin dugu hitzordua haiekin.
Teleskopioak ikasgai
Mondragon Unibertsitateko Industriari Aplikatutako Ingeniaritza Fisikoko ikasleek fisikaren oinarriak ikasten dituzte, gero ingeniaritzaren munduan aplikatzeko. Horretarako, hainbat teleskopio erabiltzen dituzte. Gailu hauen bidez esperimentatu egiten dute eta, teorian ikasi dutenak oinarri erreala duela ikusten dute.
Vera Rubin teleskopioa, Eibartik zaindua
Tekniker zentro teknologikoak parte hartu du Vera Rubin teleskopioaren garapenean. Zehazki, behatokiko tresnetako batzuen mugimendua kontrolatzeko sistemak eta hainbat segurtasun-sistema garatu ditu. Teleskopioak lehen argia ikusi badu ere, Teknikerreko ingeniariek egunero egiten dute haren jarraipena.
