Yellowstone harana, gora eta gora

Estatu Batuetako Yellowstone parke nazionalaren azpian, orain dela 640.000 urte gertatutako sumendi-erupzio batek utzitako galdara bat dago. Estatu Batuetako mendebaldean ezagutzen den galdara handiena da. Sumendi hori eragin zuen puntu beroak aktibo jarraitzen du, eta azkenaldian aktiboago dagoela hauteman dute zientzialariek.

Utah-ko Unibertsitateko eta AEBko Geologia Neurketen Agentziako (USGS) zientzialari-talde batek berri eman duenez, Yellowstone harana ohi baino gehiago altxatzen ari da itsas mailarekiko. Hain zuzen, 1923tik orain dela hiru urte arte, harana 2 zentimetro inguru altxatzen zen urtean batez beste, eta azkeneko hiru urteetan 7 zentimetro altxatu da urtean.

Jarduera handitzeak erupzioren bat gertatzea ekar lezake, baina, zientzialarien esanean, ez da berehala gertatuko. Aitzitik, esan dute inguruko lurrikara-jarduera erdira jaitsi dela. Hala ere, kontrolatzen jarraituko dute, harana hain abiadura handian altxatzeak izan ditzakeen ondorioen zain.

Argazkia: Robert B. Smith

Lakar Iraizoz, Oihane

Elhuyar Zientzia Elhuyar Fundazioko Zientziaren Komunikazioa sailean ari da lanean 2006ko urriaz geroztik. Elhuyar Zientzia eta Teknologia aldizkarian ia hilabetero artikuluak argitaratzen ditu, eta Basque Research webguneko arduraduna eta erredaktorea ere bada. Euskal Herrian egiten den ikerketaren berri ematen du Basque Researchek. Biologian lizentziatua da, Leioako EHUn egin zituen ikasketak, eta, Elhuyar Fundazioan baino lehen, Bertiz Jaurerria Parke Naturalean aritu zen lanean, bisitariei harrera egiten eta ingurunea zaintzen.

Buletina

Bidali zure helbide elektronikoa eta jaso asteroko buletina zure sarrera-ontzian

Bidali

Geologia