}

Nekazari astronomoak

2000/05/01 Elhuyar Zientzia Iturria: Elhuyar aldizkaria

Andeetan bizi diren nekazariek betidanik begiratu izan diete Pleiadei, Taurus konstelazioko izar-kumulu irekiari. Izar horiek ekainean nola ikusten direnaren arabera, patatak lehenago edo geroago ereingo dituzte. Ekainean Pleiadeak garbi ikusten ez badira, urtaro lehorra datorrenaren seinale omen da; hori ikusita, ereite-data atzeratu egiten dute nekazariek, euri berankorrak uzta busti dezan.

Kaliforniako eta Columbia Unibertsitateetako ikertzaileek herri-jakintza horrek oinarri astronomikorik duen edo ez ikertu dute, eta Andeetako nekazariak zuzen dabiltzala ikusi dute. Dirudienez, Pleiadeak atmosferan cirrus-ak, altuera handiko hodeiak, daudelako ez dira garbi ikusten eta hodei horiek El Niño fenomenoaren iragarleak omen dira. El Niñok Andeetako euriteak eteten ditu iritsi eta hilabete gutxira.

Gai honi buruzko eduki gehiago

Elhuyarrek garatutako teknologia