pHa zer den, eta gizakion pHa nola neurtzen den erakusten du bideoak.
P eta H, bi hizki baino gehiago
Hidrogeno-ioien aktibitatearen logaritmo hamartar negatiboa da. Beste modu batean esanda, pH-a, hau da, 1etik 14ra doan zenbaki bat. pH-ak disoluzio batean dagoen hidrogeno-ioien kontzentrazioa adierazten du. 7tik beherako balioa badu, disoluzioa azidoa da; hortik gorakoa bada, berriz, disoluzioa alkalinoa da.
Bi hizki soil izateak ez dio baliorik kentzen pH-ari. Zerbait landatu aurretik, adibidez, garrantzitsua da lurraren azidotasuna edo alkalinitatea zehatz ezagutzea. Kosmetikoen mundutxoan ere, pH-ak badu sona. Nork ez du noizbait ikusi bere pH-aren neutraltasuna handikiro aurkezten duen xanpu, gel edo kremarik? pH-aren neurri hori giza larruarenaren parekoa bada, 3,5 eta 8 artekoa bada, produktu horiek egunero erabili ahal izaten dira; balio-tarte horretakoa ez bada, aldiz, ezin.
Giza gorputzaren barneko pH-ak ere badu garrantzia. Bihotzerrearen errudun izan daiteke. Bihotzerrea urdaileko jariakinek esofagoan duten eraginaren ondorioa izaten da gehienetan. Azidotasuna zenbatekoa den neurtzeko, pHmetriak egiten dira. Sudur-zulotik urdailaren sarreraraino zunda txiki bat sartzen da. Zundak esofagoan gertatzen diren azido-jarioak neurtzen ditu, eta pazienteak 24 orduz gainean eraman behar duen gailu batera bidaltzen ditu.
Proba ez da atsegina, baina bai zehatza. Esperientziaz diotsuet.
Buletina
Bidali zure helbide elektronikoa eta jaso asteroko buletina zure sarrera-ontzian
Teknopolis
