Elhuyar zientziaren komunikazioa

Mendeko lehen ilargi-eklipse osoa

2001/01/09 Elhuyar Zientzia

Gaur arratsean gertatuko da. Urteko, mendeko eta milurteko lehen ilargi-eklipsea.

Titular sentsazionalista, ezta? Baina goazen harira, nola gertatzen dira ilargi-eklipseak?

Ilargi-eklipsea lurra ilargia eta eguzkiaren tartean jartzen denean gertatzen da. Orduan, lurraren itzalak ilargi betea desagerrarazi egiten du ordu betez. Eguzki-eklipseak ez bezala, ilargi-eklipseak une horretan gaua den hemisferiotik ikus daitezke eta, kasu honetan, Euskal Herritik ere bai. Dena dela, ilargia ez da guztiz desagertuko, eguzki-izpiak lurreko atmosferan errefraktatzen baitira eta, ondorioz, zenbait izpi ilargiaren azalera argitzeko moduan makur daitezke.

Ilargi- eta eguzki-eklipseen arteko beste diferentzia bat tonalitatea da. Lurraren atmosferaren gardentasunaren baitan, ilargiak hainbat tonu har ditzake. Hala gertatu zen, esaterako, Filipinetako Pinatubo sumendiak 1991n eztanda egin eta gero: atmosferako hautsaren eraginez ilargia gorrixka ikusi zen eklipse guztietan. Hala ere, atmosfera garbiarekin ilargia ia erabat iluntzea gerta liteke.

Ilargi-eklipsea gaur arratseko 20:42tan hasiko da, 20:49tan ilargia erabat ezkutatuko da eta 21:51k arte ez da berriz agertuko. Eklipsea 23:00etan amaituko da. Ikusteko aukera baduzu ez ezazu kale egin eta, aukerarik ez baduzu, 2003ko maiatza arte itxaron beharko duzu, Euskal Herritik ikustekotan behintzat!

Gehitu iruzkin bat

Saioa hasi iruzkinak uzteko.

Saioa hasi

Erabiltzaile-izenik ez baduzu, eman izena

Pasahitza ahaztu zait

Jarraitu Zientzia.eus

Eduki gehiago

Gehitu zure bloga

Zientzia app

Webgune honek cookieak erabiltzen ditu zure nabigazio-esperientzia hobetzeko. Nabigatzen jarraitzen baduzu, ulertuko dugu cookie horien erabilera onartzen duzula. Onartu
Informazio gehiago
Babesleak

Kultura eta Hizkuntza Politika Sailak (Hizkuntza Politikarako Sailburuordetzak) diruz lagundua

Eusko Jaurlaritzako Industria, Merkataritza eta Turismo Saila
Gipuzkoako Foru Aldundia