Laser bidez, bideo bat bidali dute espazioan, 31 milioi kilometroko distantziara

Lehen aldiz, laser bidezko mezu bat bidaltzea lortu du NASAk, espazio sakonetik, Lurrera. Mezua katu baten bideo bat izan da, eta helburua zen laser bidezko komunikazio-sistema berri bat probatzea, informazio asko bidali ahal izateko, argiaren abiaduran. 

Orain arte, komunikaziorako, irrati-uhinak erabili izan dituzte, baina sistema horrek ez zuen balio datu-kantitate handiak bidaltzeko. Hori gainditzeko, Psyche misioan, laser-bidezko komunikazio-sistema berri bat sartu zuten, eta orain probatu dute. Proba arrakastatsua izan da: katuaren bideoa 15 segundokoa zen, sistemak 267 megabit bidali ditu segundoko, eta seinaleak 101 segundo behar izan ditu 31 milioi kilometroko distantzia egiteko ontzitik Lurrera; hau da, 80 aldiz Lurretik Ilargira dagoen tartea, gutxi gorabehera.

Horrenbestez, NASAk baieztatu du laser bidezko sistema egokia dela Marteko misioetan informazio-transmisioa bermatzeko.