'Kometaratzeko' asmoz

ESAko Rosetta zunda Churyumov-Gerasimenko kometaren bila abiatu da gaur. Guyana Frantseseko Kourou herritik jaurti dute, eta, arazorik ez badago, 2014ko maiatza aldean sartuko da kometaren orbitan. Hara iritsitakoan, Philae izeneko ontzia kometaren nukleoaren azalera jaitsiko da, eta hango laginen analisia egingo du. Misioa 2015eko abendurako bukatuko dela iragarri dute.

Rosetta zunda duela urtebete jaurti behar zuten, gutxi gorabehera, 2012an Wirtanen kometarekin elkartu ahal izateko. Baina jaurtigailuak, Arianne 5 ospetsuak, eztanda egin zuen probetako batean, eta, ondorioz, jaurtiketa atzeratu egin behar izan zuten, eta misioa birprogramatu .

Azkenean jaurti dute zunda ESAkoek. Egun hauetan ere hainbat arazo izan dira, baina jadanik kometarako bidean dago.