Klima-aldaketak elikagaien inflazioa urtean 3,2 puntu handitu dezake

Berotze globalaren ondorioz, urteko 3,2 punturaino igo liteke elikagaien inflazioa, eta 1,2 punturaino inflazio globala. Ondorio horretara iritsi dira Communications Earth & Environment aldizkarian argitaratu duten lan batean. Gainera, ondorioztatu dute klimak eragindako inflazioa mundu osoan izango den arren, gehiago eragingo diela hegoalde globaleko herrialdeei, batez ere Afrikakoei eta Hego Amerikakoei.

Munduko ekonomia klima-aldaketarekiko sentikorra da, zuzenean eragiten diolako elikagaien ekoizpenari, beste lan askori, energia-eskariari eta giza osasunari. Klimak inflazioari nola eragin diezaiokeen ulertzea lagungarria izan daiteke aurresateko etorkizuneko klima-aldaketak nola eragin diezaiokeen inflazio-arriskuari eta munduko ekonomiari.

Ikertzaileek 1991tik 2020ra bitarteko 121 herrialdetako prezioen hileko indizeak eta datu meteorologikoak aztertu dituzte, eta klima-eredu fisiko bat erabiliz, 2030 eta 2060 bitartean berotzeak inflazioan izango duen eragina kalkulatu dute. Hala, ikusi dute 2035erako aurreikusten den tenperatura-igoerarekin elikagaien inflazioa 0,9-3,2 igo daitekeela urtean, eta inflazio orokorra 0,3-1,2. Proiekzioen arabera, latitude txikiko eskualdeetan tenperatura igotzeak inflazioa handituko du urte osoan zehar, eta, aldiz, latitude handiagoetan udan soilik gertatuko da efektu hori. 

Bestalde, 2022ko udako muturreko tenperaturek zer eragin izan zuten ere kalkulatu dute: Europako elikagaien inflazioa 0,67 puntu igo zen. Kalkulu hauen arabera, igoera hori %30 eta %50 bitartean handitu liteke 2035eko berotze-egoeretan.