Javako errinozeroak jaio dira Indonesian
2001/11/01 Elhuyar Zientzia Iturria: Elhuyar aldizkaria
Azken bi urteotan Javako lau errinozero jaio dira Javako islan bertan (Indonesia). Javako errinozeroa (R. sondaicus) desagertzear dagoen espeziea da, Lurrean dagoen ugaztun urrienetakoa baita. Ujung Kulon-eko oihan babestuan Javako 50 errinozero inguru daude eta Vietnam-en animalia berezi honen beste 5-8 ale daude. Gatibutzan ez dago mota honetako errinozero bakarra ere eta urte askotan ez da Javako errinozerorik jaio.
![](images/A170027.jpg)
World Wide Fund for Nature (WWF) elkarteak pozarren hartu du lau errinozero jaio berrien albistea. Ikertzaileek hilabeteak zeramatzaten Ujung Kulon-eko parke nazionalean errinozero hauen arrastoari segika. Ez da erraz ikusten den animalietakoa. Oihanaren sakonean ezkutatzen da eta ezkutuko argazki-kamerak erabiliz lortu dituzte errinozero jaio berrien argazkiak.
Javako errinozero-kumeak jaiotzen hasteak espezie horrek aurrera egiteko esperantza piztu du. WWF-ko ikertzaileek uste dute Ujung Kulon-eko parke nazionalean badagoela tokia 80 errinozero inguru bizi ahal izateko nekazari eta ehiztariengandik babestuta; Javako errinozero-populazioak hazten jarrai dezakeela uste dute.
![](https://elia.eus/static/elhuyar/img/elia_RGB.png)
Gai honi buruzko eduki gehiago
Elhuyarrek garatutako teknologia