Garuneko hainbat asaldurak oinarri genetiko bera izan dezakete

Garuneko hainbat asaldurak oinarri genetiko bera izan dezakete


Garuneko hainbat asalduraren korrelazio genetikoa aztertu du nazioarteko ikerketa-talde batek, milioi bat pertsona baino gehiagoren genomak alderatuta. Ondorioztatu dute asaldura psikiatriko askok aldaera genetiko berak dituztela, eta asaldura neurologikoak, berriz, desberdinagoak direla bai elkarrekiko eta bai asaldura psikiatrikoekiko ere, oinarri genetikoari dagokionez. Science aldizkarian eman dute emaitza hauen berri.

Hogeita bost garun-asaldura aztertu dituzte, neurologikoak eta psikiatrikoak, eta baita epilepsia, migraina eta iktus iskemikoa ere. Horretarako, 265.218 gaixoren eta 784.643 pertsona osasuntsuren genomak alderatu zituzten.

Gaixotasun neurologikoetan, alzheimerra eta esklerosi anizkoitza kasu, ez dute ia korrelaziorik topatu. Asaldura psikiatrikoetan, aldiz, korrelazio asko ikusi dituzte. Nabarmenena anorexia mentalaren, nahasmendu obsesibo-konpultsiboaren eta eskizofreniaren artekoa izan da, eta, aldi berean, eskizofreniak aztertutako asaldura psikiatriko gehienekin lotura duela ikusi dute. Autismoa eta Touretteren sindromea, berriz, salbuespenak dira, ez baitute loturarik gainerako asaldura psikiatrikoekin. Eta, asaldura psikiatrikoekin lotura duen asaldura ez-psikiatriko bakarra migraina izan da. Hain zuzen ere, ikusi dute migrainak lotura izan dezakeela Touretteren sindromearekin, arreta-defizitaren eta hiperaktibitatearen nahasmenduarekin, eta depresio nahasmendu larriarekin.

Etxebeste Aduriz, Egoitz

Elhuyar Zientzia Itsas Biologian eta Animalia Biologian lizentziatua, La Lagunako Unibertsitatean (Tenerife). AZTI-Tecnalian hasi zuen bere ibilbide profesionala, hainbat ikerketa-proiektutan parte hartuz. 2006ko azaroaz geroztik Elhuyar Fundazioko Zientziaren Komunikazioa sailean ari da lanean. Elhuyar Zientzia eta Teknologia aldizkariko erredaktorea eta erredaktore-burua da, eta Zientzia.net webgunearen arduraduna.

Buletina

Bidali zure helbide elektronikoa eta jaso asteroko buletina zure sarrera-ontzian

Bidali

Osasuna