}

Tamaina aldakorreko iguana

2000/03/01 Elhuyar Zientzia Iturria: Elhuyar aldizkaria

Amblyrhynchus marins espezieko iguana Galapago irletan bizi da eta itsas alga berde eta gorriak dira bere dietaren osagai nagusia.

Ikertzaileek 18 urtetan aztertu dituzte eta azterketa horietan erroreei egotzitako neurri-aldaketak nabaritu zituzten. Ikerketen berrikuspenek eta neurketa berriek, neurri-aldaketak benetakoak zirela aditzera eman dute, ordea. Galapagoetako iguana horrek gosetea denean bere tamaina % 20 txikiagotzeko gaitasuna du, txikiagotzeak eskeletoa ere barne hartzen duelarik. Iguanaren txikiagotze-periodoak El Niño efektuaren urte latzenetan izan ziren, Ozeano Bareko uren tenperatura aldaketen ondorioz alga berde eta gorriak desagertu ziren garaian hain zuzen.

1997-98 urteetan iguanek ia 7 cm galdu zituzten, aldaketa nabarien jasan zutenak ale emeak izan zirelarik. Zentimetro bat galtzeak % 10 handitzen du iguanen biziraupena. Baina harrigarriena ez da tamaina galtzeko gaitasuna: gosetea amaitutakoan iguanek hasierako neurria berreskuratzen dute berriro.

Gai honi buruzko eduki gehiago

Elhuyarrek garatutako teknologia