Paleoentomologiak eta anbarak badute aldizkari bat

Alavesia du izena paleoentomologiaren, anbararen inklusioen eta kontinenteetako artropodo fosilen azterketari eskainitako nazioarteko lehen aldizkariak. International Palaeoentomological Society-k (IPSek) egiten du, eta Arabatik bertatik zuzentzen dute: Gasteizko Natur Zientzietako Museoak koordinatzen du, eta Arabako Foru Aldundiak editatu. Urtean behin argitaratuko dute, ingelesez, eta mundu osoko ikertzaileek idatziko dituzte artikuluak. 2007ko zenbakia kalean da dagoeneko. Alavesia izena Urizaharrako anbar-aztarnategietan aurkitutako intsektu-genero bati zor zaio.