Osiris-Rex zundak lortu du Bennu asteroidetik lagina hartzea

2020/10/21 Agirre Ruiz de Arkaute, Aitziber - Elhuyar Zientzia Iturria: Elhuyar aldizkaria

Osiris-Rex zundak asteroideko lagina hartu duen unearen irudikapena. Arg. NASA

2016an jaurti zuten Osiris-Rex zunda espaziala, eta, bi urte eman ditu Bennu asteroidearen inguruan orbitatzen. Gaur, gaueko 00:05 h-etan, hamar segunduz asteroidean pausatu eta lagina hartzea lortu du, iragarrita zegoen bezala.

Zundak nitrogeno konprimitua bota du asteroidearen azalean, eta harrotutako partikulak jaso ditu xurgagailu batez. Helburua zen, gutxienez, 60 g jasotzea, baina asteburua arte ez dute argituko zenbat gramo jaso dituen. 2023an laginak Lurrera iritsiko direla kalkulatzen da.

NASAko ikertzaileek uste dute lagin horiek garrantzitsuak izango direla eguzki-sistemaren sorrera ulertzeko, jatorrizko material haiek eraldatu gabe mantendu baitira asteroide-mota honetan. Planeten eta Eguzkiaren beraren sortze-prozesua hobeto ezagutzen lagunduko duten esperantza dute.

Bennu asteroidearen orbita periodikoki gure planetaren orbitarekin gurutzatzen da, eta kalkulatzen dute 2135. Urtean Lurraren eta Ilargiaren artetik pasako dela.