Marteri buruzko datu berriak argitzen

(Argazkia: G. Neukum/ESA/DLR/FU Berlin)

Sekretu asko gordetzen ditu Marte planetak oraindik, baina, pixkanaka, horietako batzuk argituz doaz. Azkenekoak, planeta gorriaren berokuntzari azalpena ematen dion teoria berria eta izotzezko egiturak diruditen formazioen argazkiak.

Marteren berokuntza-prozesua argitu gabe dago oraindik. Zientzialariek karbono dioxidoa (CO₂) jotzen zuten planeta gorriaren berokuntzaren erantzule, Lurrean bezala. Baina, hala balitz, karbonoa gainazalean jalki eta karbonodun mineralak egongo lirateke. Marten, ordea, sulfatodun mineralak aurkitu dituzte. Sulfatoak sufre dioxidoa (SO₂) gainazal hezean jalkitzean sortzen dira. SO₂-a sumendien jardueragatik askatzen da, eta baliteke substantzia horren pilaketa handiek tenperatura igoarazi eta, beraz, ura lurrunaraztea, CO₂-ak bezala. Horregatik, zientzialariek uste dute Marteren berokuntzaren erantzulea SO₂-a dela.

Marteren gainazaleko tenperaturaren ondorioz azaleratutako izotz guztia lurrundu egiten zela uste zuten zientzialariek --poloetan izan ezik, Marteren poloetan izotz-egitura zahar eta handiak baitaude--. Baina Mars Express misioak poloetatik urrun dagoen izotz-egitura bat ikuskatu du, glaziar baten antzekoa. Lortutako lehen datuen arabera, badirudi glaziar hori izoztutako urez osatua dela.