Koloreek eraginik badute gizakiaren memorian

Gizakiaren ikusmenak kolore argitsu eta alaiak gustukoago ditu Estatu Batuetako Psikologia Elkartearen aburuz. Erakunde horrek gizakiaren ikusmen-sistemak koloreen informazioa nola aztertzen duen argitaratu berri du. Aipatu elkarteko hiru psikologo estatubatuarrek Europan barna egin dituzten esperientzien arabera, gizakiak koloretako irudiak zuri-beltzekoak baino hobeto memorizatzen ditu.

Parte-hartzaileei, esperimenturik sinpleenean, 48 irudi ezberdin eman zitzaizkien bakoitza denbora jakin batean ikusteko. Argazki gehienak lore, landare, baso eta harriz horniturik zeuden. Minutu batzuk pasatu ondoren parte-hartzaileei 48 argazkiak berriro begiratzeko eskatu zitzaien, eta zeinetaz oroitzen ziren galdetu.

Emaitzek argi erakusten dute koloretako irudiak gainerakoak baino askoz ere hobeto gordetzen ditugula gogoan. Zuri-beltzeko irudi anitz sekula ez zituztela ikusi aipatu zuten parte-hartzaile askok. Psikologo estatubatuarren iritziz, ez dago memoria indartzen duen kolore berezirik, baina kolore naturalek, oro har, gure ikusmena bizkortzen duten dudarik ez dago.