Elhuyar zientziaren komunikazioa

Duela 550 milioi urteko animalia mugikor eta bilateral baten fosila aurkitu dute

2019/09/05 Galarraga Aiestaran, Ana - Elhuyar Zientzia Iturria: Elhuyar aldizkaria

duela-550000-milioi-urteko-animalia-mugikor-eta-bi
Duela 550 milioi urte inguruko animalia baten fosilak aurkitu dituzte Txinan. Arg. Virginia Tech Zientzia Fakultatea

Orain arteko aztarnetan oinarrituta, zientzialariek uste zuten mugimendua duten animalia bilateralak Ediacara periodoan eboluzionatu zutela (duela 635-542 milioi urte). Orain, horrelako animalia zaharrenaren fosilak eta hark utzitako arrastoak aurkitu dituzte, Dengyingen, Yangtze ibaiaren arroilen inguruan (txina). Kalkuluen arabera, duela 551-539 milioi urte bizi izan zen animalia hori.

Nature aldizkarian argitaratu dute ikerketa. Egileek nabarmendu dutenez, oso aurkikuntza garrantzitsua da, orain arte halako animaliek narrastean utzitako arrastoak baino ez baitituzte aurkitu. Orain, baina, animalien gorputz fosilduak ere azaldu dira, utzitako arrastoen ondoan.

Yilingia spiciformis deitu diote, eta, guztira, 35 ale bildu dituzte. 5-26 mm zabal zen eta 27 cm luze izatera irits zitekeen. 50 segmentuta banatuta zegoen, ahoa eta isatsa zituen, bizkarra eta sabela, eta simetria bilaterala. Hau da, animalia gehienek, guk barne, dituzten ezaugarriak zituzten.

Arrastoak, berriz, itsas hondoan narrasean ibiltzean sortu zituztela ondorioztatu dute zientzialariek. Mugitzeko gai izateak, gainera, iradokitzen du nerbio-sistema bat zutela, eta haren eraginpean erabakitzen zutela alde batera edo bestera joatea.

Hori guztia aintzat hartuta, ikertzaileek ez dute zalantzarik aurkikuntza esanguratsua dela ikuspegi ebolutibotik.

Gehitu iruzkin bat

Saioa hasi iruzkinak uzteko.

Saioa hasi

Erabiltzaile-izenik ez baduzu, eman izena

Pasahitza ahaztu zait

Jarraitu Zientzia.eus

Gehitu zure bloga

Zientzia app

Webgune honek cookieak erabiltzen ditu zure nabigazio-esperientzia hobetzeko. Nabigatzen jarraitzen baduzu, ulertuko dugu cookie horien erabilera onartzen duzula. Onartu
Informazio gehiago
Babesleak

Kultura eta Hizkuntza Politika Sailak (Hizkuntza Politikarako Sailburuordetzak) diruz lagundua

Eusko Jaurlaritzako Industria, Merkataritza eta Turismo Saila
Gipuzkoako Foru Aldundia