Diamantea lortu nahian

C₆₀-ren molekulak edo oro har fuelerenoen (C₆₀, C₇₀, C₇₆, ...) molekulak sintetizatzeko aurkitutako metodoaz geroztik izugarrizko ikerketa-lasterketan ari dira ikerlariak.

Argentinako Bariloche-ko zentru atomikoko ikerlari batek (Frantzian dagoen oso tenperatura baxurako ikerketa-zentruan lan egiten du) Montpellier-ko unibertsitateko ikerlari batzuekin batera, goi-presioan fuelerenoen kondukzio elektrikoaren propietateak aztertu ditu.

Antza denez, C₆₀, C₇₀ eta C₆₀I₄ substantziek, zenbait fasetan, kondukzio txikiagoko egoera omen dute. Hau dela eta, zenbait saiakuntza egin da kondukzio txikiagoko fase hauek egonkortu nahian. Azkenik, konpresio-baldintza ez-isotopoetan, C₆₀ren hauts beltza 150 kbar baino presio handiagora konprimatzen bada, automatikoki pastila distiratsu eta garden bihurtzen da.

Grenoble-ko kristalografi laborategian burututako kristalografi analisiak kristal anitzeko diamantea dela frogatu du.

Ingurugiro-tenperaturan diamantea lortzen den lehen aldia izan da hau. Orain arte erabilitako metodoek tenperatura altuak behar zituzten. Fuelerenotik diamanterako aldaketak industri aplikazioen eremuan eragin handia izan dezake.