Bateriak itsasoko uretatik abiatuta

Badakizu itsasoaren urak balio duela bateriak egiteko? Gaur egun, litioa da nagusi baterietan. Litio-ioizko bateriak ohikoak dira gailu elektronikoetan, auto elektrikoetan eta beste aplikazio askotan. Baina litioa urria da planetan, eta sodioa izan daiteke horren ordezkoa bateriak egiteko. Ez da litio bezain eraginkorra, baina aplikazio askotarako nahikoa da. Eta, batez ere, ugaria da; besteak beste, itsasoan sodio asko dago.