}

XI. CAF-Elhuyar sariak banatu dira

2005/03/08 Carton Virto, Eider - Elhuyar Zientzia

Zientzia-dibulgazioko XI. CAF-Elhuyar sariak martxoaren 4an banatu ziren Lasarte-Oriako Txitxardin Beltxa jatetxean. Aurtengo edizioan 25 lan aurkeztu dira eta irabazlea Begoña Arrate Larrañaga biologo urnietarra izan da Gure alde basatiaren barna izeneko artikuluarengatik. Ugalketaren inguruko lan horri esker, 1.000 € eta Imanol Andonegi eskultoreak egindako oroigarria jaso zituen.

Bigarren saria hirukote batentzat izan zen: Jokin Lapaza eta Eneko Salaberria donostiarrentzat eta Manuel Mendez lasartearrarentzat. Hirurak EHUn lizentziatutako biologoak dira eta Kakalardoak, basoko berri-emaileak izeneko dibulgazio-artikulua aurkeztu zuten sarietara. Kakalardoek basoen egoerari buruz ematen diguten informazioari buruzko dibulgazio-artikulu horrengatik 500 € eta oroigarria jaso zituzten.

Hirugarren saria, 300 € eta oroigarria, Ibon Odriozola EHUko kimikari azpeitiarrak jaso zuen A zer molekula usaina! izeneko artikuluarengatik. Molekulek eduki kimikoaren arabera eragiten dituzten sentsazioei buruzko artikulua da.

Azkenik, Gazteentzako Sari berezia (300 € eta oroigarria) Mikel Gorrotxategi Nafarroako Unibertsitateko ingeniaritza-ikasleak eskuratu zuen Ozono geruzaren zuloa lanarengatik.

Epaimahaia honako hauek osatu zuten:

    Koldo Nuñez: Geologian doktorea eta zientzia-dibulgatzailea.
    Pili Kaltzada: Kazetaria eta zientzia-dibulgatzailea.
    Mikel Alvarez: Medikua eta Basurtuko Ospitaleko zuzendari nagusia.
  • Julián Florez: Industria Ingeniaritzan doktorea, Nafarroako Unibertsitateko irakaslea eta VICOMTech ikerketa-zentroaren kudeatzailea.

Guztien izenean Koldo Nuñez-ek hitz egin zuen , eta, lanen kalitatea azpimarratzeaz gain, zientziaren dibulgazioa formalki irakasteko bideak jarri behar direla adierazi zuen.

Artikulu irabazleak apirileko Elhuyar Zientzia eta Teknika aldizkarian irakurri ahal izango dira.

eu es fr en ca gl