Saturnoko hexagonoa, laborategian

Saturnoren ipar-poloan, atmosferako haizeek hexagono-itxura hartzen dute. Bada, Oxford Unibertsitateko fisikari batzuek forma bereko zurrunbiloak sortu dituzte urarekin, eta azaldu egin dute zer dela eta sortzen diren horrelakoak.

Mantso biratzen ari zen mahai baten gainean 30 litroko zilindro bat ur jarri zuten, eta zilindroaren barruan mahaia baino azkarrago biratzen zen eraztun txiki bat sartu zuten. Eraztun txikiaren mugimenduak zurrunbiloak eratu zituen ur-zilindroan. Hala, ur-zilindroak Saturnoren atmosfera ordezkatu zuen; eraztunak, Saturno bera; eta zurrunbiloek, Saturnon ikusi ohi diren eraztun-antzeko formak.

Ikertzaileek ikusi dute eraztunaren biratze-abiadura aldatuta aldatu egiten dela zurrunbiloen forma, eta obaloak, hirukiak, karratuak eta, noski, hexagonoak, eratu dituzte. Azaldu dutenez, zenbat eta handiagoa izan eraztunaren eta ur-zilindroaren biratze-abiaduraren arteko desberdintasuna, orduan eta alde gutxiago ditu poligonoak.Saturnoko iparraldean, sei aldeko poligonoak eragiten ditu planetaren eta atmosferako haizearen biratze-abiaduraren arteko desberdintasunak.

Argazkia: Anna Barbosa Agular; barrukoa (Saturnoko haize-zorrotada hexagonala), NASA, JPL, Arizona Unibertsitatea