Lurraren durrunda, ozeanoek sortua

Zientzialariek aspalditik uste zuten ozeanoak jarduera sismikoaren sortzaile zirela, baina ustea ez da nahikoa izaten, eta, orain, zuzen zebiltzala frogatu dute. Hain zuzen, Labrador Itsasoaren eta Islandiaren arteko eremuan frogatu dute olatuek talka egiten dutenean bibrazioa bidaltzen dutela itsas hondora eta horrek sortzen duen durrunda handik milaka kilometrora ere detekta daitekeela. Mikroseismo horien azterketa lagungarria da Lurraren azalaren egitura hobeto ezagutzeko. Proceedings of the Royal Society A zientzia-aldizkarian argitaratu dute ikerketa.