Kolon-minbiziaren adierazle

Koloneko minbiziaren eraginez ebaketa jasan dutenek, minbizia berriz sortzeko arriskua izaten dute. Gainera orain arte, ez da minbizia aurrikusteko biderik egon.

Montrealen dagoen McGill unibertsitateko eta Royal Victoria ospitaleko ikerlari-talde batek aurkikuntza garrantzitsua egin du koloneko minbiziaren alorrean. Koloneko minbiziaren eraginez hildako pertsonen kolon-ehunetan, proteina jakin baten kontzentrazioa minbiziaz bost urte edo gehiago irautea lortu dutenengan baino askoz ere handiagoa zela konturatu ziren. Proteinaren izena PCNA da eta zelulen banaketa-prozesuarekin lotuta dago. Proteina hau identifikatu ahal izateko, PCNA besterik ezagutzen ez zuen antigorputz monoklonal bat erabili zuten.

Ikerlari-taldeak dioenez, ebaketa jasandako gaixoen erdiari, gutxi gora-behera, gaixotasuna berriz sortzen zaio. Ikerketa burutzeko 40 gaixoren kolon-zatiak aztertu zituzten. Zati hauetan zelula kantzerigenoekin batera ehun normalak zeuden eta zelulen PCNAren kontzentrazioa zenbatekoa zen jakiteko “proliferazio-indize” deritzona erabili zuten. Azterketa honetatik, hildako pertsonen zelula kantzerigeno eta normalek bizirik zeudenenek baino “proliferazio-indize” handiagoa zutela ondorioztatu zuten.

Ikerketak aurrera egingo badu ere, badirudi lehenengo ondorioak kolon-kantzerraren eraginez ebaketa jasan izan dutenengan jadanik aplikatzen has daitezkeela. Nahikoa da test bat egitea eta PCNAren maila jakitea, minbizia berriz sortu aurretik erremedioak (normalean kimioterapia) aplikatzen hasteko.