Haserrea, proteina eta arazo kardiobaskularrak

Susmo sendoa zegoen lehendik ere, baina adituek geroz eta lotura zuzenagoa ikusten dute haserrearen eta bihotzeko gaitzen artean. Duke Unibertsitatean (AEB) egindako azterketa batean, haserretzeko joera C-erreaktibo proteinarekin (CRP) lotu dute. Eta, aditu askoren ustean, proteina hori kolesterol-maila baino adierazle hobea da bihotzeko gaitzak izateko arriskua neurtzeko.

Azterketarako 18 eta 65 urte bitarteko 127 lagun hartu zituzten, guztiak osasuntsuak. Eta, batetik, hiruna test bete zituzten depresio-, haserre- eta erresumin-emozioen egoera ezagutzeko; eta, bestetik, odoleko serumeko CRP-maila neurtu zieten.

Bi datu-multzoak alderatuta, ikusi zuten emozio negatiboz jositako lagunek bi edo hiru aldiz CRP gehiago zeukatela alaienek eta baikorrenek baino, eta, horrenbestez, bihotzeko gaitzak izateko arrisku handiagoa zeukatela.