Etxerako moduko euli robotikoa

Kalifornian, Berkeleyko unibertsitatean, proiektu bitxia garatzen ari dira: euli robotikoa. Bukatzen dutenean, euliak 25 milimetro izango ditu eta, benetako euliak bezala, hegan egiteko gai izango da. Proiektu horren bidez, adituek bideragarritasun-analisiak, fabrikazio-egiturak, aerodinamikaren eta mugimenduaren azterketak eta hegaldien kontrolak egingo dituzte.

Proiektua dirudiena baino askoz ere zailagoa da; izan ere, duela gutxira arte adituek ez dute jakin benetako eulien hegoen mugimenduak nolakoak diren. Hegan egiteko euliek hiru mugimendu-mota erabiltzen dituzte. Horri esker, euliak beren pisuaren bikoitza garraiatzeko gai izaten dira; energia gutxi erabilita gainera. Naturak berez sortu duen hori gailu robotiko bihurtzea ez da erraza, euliak 20 miligramo baino gutxiago izan behar baititu eta hegoak segundo batean 150 aldiz mugitu.