Asteko argazkia: landareak, Lurreko iraungitze masibo handienean

Nola biziraun zuten landareek Lurraren iraungitze masiboa handienean? Galdera horri erantzun nahi izan dio ikerketa batek, zientziak ez baitu xehetasunez argitu zer gertatu zitzaien duela 252 milioi urte gertatutako Permo-Triasikoko iraungitzean, Lurrak inoiz izan duen biodibertsitate-galera handienean.

Bulkanismo masiboaren ondorioz, atmosferako CO₂ maila ikaragarri handitu zen, berotze globala eraginez, 40-65 ºC izateraino, eta ozeanoan anoxia orokorra eta azidifikazioa sortuz. Ondorioz, itsasoko animalia-espezieen % 81 eta lurreko ornodunen % 70 desagertu ziren.

Landareen kasuan, basoak desagertu eta landare baskular sinple eta dibertsitate urrikoak baino ez ziren geratu: likofitoak, batez ere. Landare haiek irautearen arrazoia argitu dute orain: estresak eraginda, fotosintesian aldaketak egin zituzten, fotosintesi malguago eta urarekiko eraginkorragoa lortuz. CAM fotosintesia deitzen zaio, eta hori izan zitekeen iraungitze masibotik libratu zituena, Nature Ecology & Evolution aldizkarian argitaratutako ikerketa baten arabera.