}

2007ko Espainiako Ikerketa Saria Enrike Zuazuarentzat

2007/10/05 Galarraga Aiestaran, Ana - Elhuyar Zientzia

Enrike Zuazuak udaberrian jaso zuen Zientzia eta Teknologia arloko 2006ko Euskadi Ikerketa Saria . Orain, berriz, Espainiako Zientzia eta Hezkuntza Ministerioak banatzen dituen Espainiako Ikerketa Sarietako b at emango diotela jakinarazi dute.
Enrike Zuazua.
Nagore Rementeria

Hain zuzen ere, urteko ikertzaile onenak saritzeko bost sari ematen ditu ministerioak urtero, zientziaren hainbat arlotan, eta aurten Enrike Zuazuari egokitu zaio Matematika eta Informazio eta Komunikazio Teknologien saria.

" Julio Rey Pastor " izena du sariak, eta deribatu partzialetan eta kontrolaren teorian egiten ari den lanarengatik eman diote Enrike Zuazuari. Sarituaren esanean, "munduaren funtzionamendua ulertzeko eta bizi-kalitatea hobetzeko matematikek eta konputazio-metodo berriek duten izugarrizko gaitasuna nabarmentzen du sariak".

Espainiako Ikerketa Sarien gainerako saridunak, berriz, hauek dira: Ignacio Cirac, Fisikaren, Materialen eta Lurraren Zientzien alorrean; Carlos Duarte, Baliabide Naturalen Zientzia eta Teknologia alorrean; Luis Oro, Kimikaren Zientzia eta Teknologia alorrean; eta Daniel Ramón, Teknologiaren Transferentzia alorrean.

Gai honi buruzko eduki gehiago

Elhuyarrek garatutako teknologia