Zeres, bi mendez behatuta
2002/01/08 Elhuyar Zientzia
![](images/E020108.jpg)
Eguzki-sisteman planeten 'banaketa' betidanik interesatu zaie astronomoei. Garai batetik aurrera, begi hutsez ikusten ez diren planetak aurkitzen hasi ziren. Batzuk oso urruti daude ikusi ahal izateko; Saturnotik haraindi daudenez ari gara, noski. Baina kalkuluek galdera bitxi bat planteatzen zuten: gertuko planeten kokapena ikusita ez al da planeta bat falta Marte eta Jupiterren artean?
Erantzuna Giusseppe Piazzi astronomo italiarrak eman zuen 1801. urtean. Planeta bat izan beharrean, Piazzik asteroide bat aurkitu zuen, itxura esferikoa duen 930 kilometroko harria. Geroztik, beste hainbat asteroide aurkitu dira eskualde berean, denak ere Zeres baino txikiagoak. Horrela, planeta handia sortu beharrean, eskualde horretako materia asteroidetan banatuta dagoela ondorioztatu zuten, asteroide-gerrikoa dela, alegia.
Gaur egun, bai Zeres bai eta gerrikoko beste asteroideak Hubble teleskopioaren bitartez aztertzen ari dira. Joan den urteko behaketetan asteroide horren azalean orban handi bat detektatu zuten; seguruenik, beste asteroide baten aurka talka egin zueneko 'gerra-zauria'.
![](https://elia.eus/static/elhuyar/img/elia_RGB.png)
Gai honi buruzko eduki gehiago
Elhuyarrek garatutako teknologia