Ehun eta hemezortzi elementu ditu taula periodikoak; bada, elementu horiei buruzko bideo bana jarri dute Interneten, You Tube famatuan. Britainia Handiko Nottingham Unibertsitateko talde batek prestatu eta grabatu ditu.
Elementu bakoitzari buruzko zerbait kontatzen dute bideoetan: bitxikeriaren bat, erabilpenen bat, esperimentu ikusgarriren bat... Adibidez, tungstenoari buruz esaten dute, besteak beste, tungstenozkoa izaten dela bolalumek puntan izan ohi duten bolatxoa.
Helburu nagusia kimikarekiko interesa handitzea da. Eta, lortu dutela esan daiteke, jaso duten bisita-kopuruari erreparatuta. Orain dela hiru bat aste hasi ziren bideoak You Tuben sartzen, eta dagoeneko 175.000 bisitaritik gora izan dituzte.
Irudia: You Tube
Lakar Iraizoz, Oihane
Elhuyar Zientzia Elhuyar Fundazioko Zientziaren Komunikazioa sailean ari da lanean 2006ko urriaz geroztik. Elhuyar Zientzia eta Teknologia aldizkarian ia hilabetero artikuluak argitaratzen ditu, eta Basque Research webguneko arduraduna eta erredaktorea ere bada. Euskal Herrian egiten den ikerketaren berri ematen du Basque Researchek. Biologian lizentziatua da, Leioako EHUn egin zituen ikasketak, eta, Elhuyar Fundazioan baino lehen, Bertiz Jaurerria Parke Naturalean aritu zen lanean, bisitariei harrera egiten eta ingurunea zaintzen.
