Proiektu inspiratzailea: nondik galtzen du energia gure ikastetxeak?

Gaia

Eraikinen efizientzia energetikoa

Testuingurua

Eraikinetan erabiltzen den energiaren zati bat galdu egiten da, bero-galeren edo bentilazioaren bitartez, adibidez. Beraz, funtsezkoa da eraikinek isolamendusistema eraginkorrak izatea, energia-galerak gutxitu eta baliabideak ahalik eta gehien aprobetxatzeko. Gainera, energia berriztagarriak lortzeko sistemak, hala nola bero-ponpak edo eguzki-kolektoreak, erabiltzea irtenbide ezin hobea da eraikinen erregai fosilekiko mendekotasuna eta berotegi-efektuko gasen emisioak murrizteko. Eraikinen energiaefizientziak ingurumenean eragina izateaz gain, ekonomian ere eragina izan dezake, energia gutxiago kontsumitzeak diru asko aurreztea ekar dezakeelako.

Beraz, eraikinetan energia berriztagarriak erabiltzea, isolamendu-sistema eraginkorrak izatea eta energiakontsumoa murriztea funtsezko neurriak dira etorkizun jasangarriago eta arduratsuago bat eraikitzeko.

Ikerketa-galdera:

Nondik galtzen du energia gure ikastetxeak? Nola murriztu daitezke energia-galera horiek? Nolakoa da gure ikastetxearen energia-efizientzia?

Ikerketaren helburuak

• Eraikinen energia-kontsumo eta –galerak aztertzea.
• Eraikinen energia-efizientzia zer den ulertzea eta eraikinen energia-efizientzia sustatzeko faktoreak ezagutzea: galerak murriztea, instalazioak hobetzea…
• Eraikinetan erabil daitezken energia berriztagarriak ezagutzea.
• Ikastetxearen energia-efizientzia aztertzea eta hobekuntzarako proposamenak egitea: isolamendu-sistemak, energiaren jatorria…

Esperimentaziorako proposamena

• Eraikinen energia-efizientziari buruzko informazioa bildu eta aztertu.
• Ikastetxearen energia-galerak eta energia-efizientzia aztertzeko, honako esperimentu hauek egin daitezke: Oharra: esperimentu batzuk egiteko, ezinbestekoa da adituen laguntza.
• Zubi termikoak eta tenperatura-banaketa aztertzeko entsegu termografikoak.
• Pareten erresistentzia termikoaren neurketa.
• Geletako infiltrazioen kalkulua, ate-haizagailu entseguaren bidez.
• Ikastetxeko instalazio termikoak ezagutu eta aztertu.
• Energia-kontsumoaren inguruko fakturak aztertu eta beste eraikin batzuetako fakturekin alderatu.
• Emaitzen azterketa: aztertutako informazioarekin eta esperimentuetan lortutako datu guztiekin ikastetxearen energia-efizientziaren inguruko txostena egin.
• Ikastetxearen energia-efizientzia hobetzeko proposamenak egin.
• Komunikazioa: emaitzak hainbat modutan zabaldu daitezke, hala nola proiektuaren txostena eta/edo bideoa ikastetxearen webgunean eta sare sozialetan jarriz, erakusketa baterako panelak egin eta ikastetxean/herrian jarriz, ikastetxeko zuzendaritza-taldekoekin eta irakasleekin bilera bat eginez, hitzaldiak antolatuz (ikasleentzat, gurasoentzat…), proiektua zientzia-azoka batean aurkeztuz…

*Oharra: esperimentu batzuk egiteko, ezinbestekoa da adituen laguntza.

Hausnarketarako gakoak

• Zenbat energia gastatzen duzu zure egunerokoan? Zerrendatu non erabiltzen duzun energia.
• Energiaren gehiegizko kontsumoa eta baliabideen xahuketa.
• Beharrezkoa da udan aire girotua eta neguan berogailua hain fuerte jartzea?
• Energia berriztagarriak: geotermia, biomasa…

Proiektu gehiago ikusteko, sakatu hemen.

Proiektu hau Elhuyarrek sustatu du, eta Gipuzkoako Foru Aldundiko Ekonomia Sustapeneko eta Proiektu Estrategikoetako Departamentuaren laguntza du.