Nitrogeno solidoa: espazio-ontzietarako erregai berria?

Hidrazina, nitrogenoan aberatsa den konposatua, gaur egungo espazio-ontzi askoren erregaia da. Baina Bartlett-en lan-taldearen ustez, N ₅ ⁺ N ₅ ^- -ak hidrazinak baino bi aldiz bero-ahalmen handiagoa izango du. Hori hala balitz, erregai-tangak txikiagoak izango lirateke eta, beraz, tamaina txikiagoko espazio-ontziak egiteko bidea legoke; izan ere, gaur egungo espazio-ontzien bolumen handiena erregaiak betetzen du.

Nitrogenoak zerikusi handia du lehergai eta, oro har, erregaiekin. Izan ere, nitroglizerina eta TNTa (trinitrotoluenoa) oso lehergai ezagunak dira. Horrek N ₂ gasaren egonkortasunarekin du zerikusia. Alegia, bi nitrogeno-atomo baino gehiago dituzten konposatuetan N ₂ -a eratzeko joera handia dago, eta prozesu horretan energia-kantitate itzela askatzen da. Hori da, adibidez, hidrazinarekin gertatzen dena.

Bartlett-en lan-taldeak iragarritako konposatua bost nitrogenoko taldeak elkartuz egingo omen da: talde batek karga positiboa izango du (N ₅ ⁺ ) eta besteak karga negatiboa (N ₅ ^- ). Horrela, N ₅ ⁺ N ₅ ^- sare kristalinoa eratuko da (gatz arrunta den sodio kloruroan Na ⁺ eta Cl ^- ioiekin gertatzen den bezala).

N ₅ ⁺ N ₅ ^- konposatuaren erdia (N ₅ ⁺ -a, alegia) duela hiru urte lortu zen, baina orain arte inork ez du lortu N ₅ ^- -a sintetizatzea. Hala ere, Floridako kimikariek uste dutenaren arabera, bost nitrogeno-atomoko eraztuna izan beharko du, karga negatiboa duen eta karbonoz eratuta dagoen pentadienil eraztunaren antzekoa.

Hori lortzen bada, aurkikuntza ikaragarria izango da erregaien munduan.