}

Mont Blanc hiru metro hazi da

2001/11/01 Elhuyar Zientzia Iturria: Elhuyar aldizkaria

Mont Blanc hiru metro hazi da

Europako mendirik garaienak 4.810 metro eta 40 zentimetro dauzka, eta ez, orain arte uste zen bezala, 4.807 metro. Neurketa berria urrian iragarri zuten Savoia Garaiko geometrialarien biltzarrean. Mont Blanc bere altuerari leial al zaio? espedizioa irailaren 7an abiatu zen Mont Blanc-en gailurrerantz. Frantziako Institutu Geografikoko 10 geometrialarik eta hiru gidarik osatzen zuten taldea. Helburua bikoitza zen: Mont Blanc mendiaren garaiera zehatza neurtzea eta geometrialarien lana ezagutzera ematea.

Neurketak irailaren 8an, goizeko zazpietan, hasi ziren. Bailaran, altuera eta posizio zehatzetan, lau antena kokatu zituzten eta gailurrean beste bi. Antenez eta GPS sistemaz baliatuta gailurraren garaiera zehatza neurtu ahal izan zuten: 4.810 metro eta 40 zentimetro, 10 zentimetro gora behera. GPS teknologia Kilimanjaro eta Everest mendien garaiera neurtzeko erabili da dagoeneko. Horrela jakin zen, esaterako, Everest ek 8.846,4 metro dauzkala, eta ez, 8.848 metro.

Gai honi buruzko eduki gehiago

Elhuyarrek garatutako teknologia