Linux Mandrake 8.2 euskaraz

Sistema eragile hori geroz eta zabalduago zegoela eta, euskaratzea erabaki zuen Eusko Jaurlaritzak. Baldintza itzulpen bateratua izatea zen, eta oinarrizko sistema eragilearen zati garrantzitsuenak euskaraz ematea, eta Elhuyarrek eta UZEI-k egin dute, lehen Windows-ekin egin zuten bezala.

Kultura propioa

Linus Torvalds da Linux sistema eragilearen sortzailea. 1991n Helsinki-ko Unibertsitateko ikasle zenak proiektu moduan landu zuen sistema eragile berri horren hasiera, eta boluntarioen laguntzari esker joan da garatzen Internet bidez.

Linux-en eraginkortasuna batetik, eta bere egonkortasuna bestetik, aipatu izan dira askotan sistema horren arrakasta azaltzeko. Baina ez hori bakarrik: hardware desberdinetan lan egiteko ahalmena du Linux-ek, beste sistema eragile batzuek ez bezala.

Askoren ustez, ordea, ez da hau Linux-en arrakastaren oinarri bakarra. Linux munduak filosofia eta kultura propioa ditu. Linux-ek informatikaren kontzeptu berria sortu du: software librea.

Linux-en euskarazko bertsioa

Linux Mandrake 8.2 bertsioa izan da itzulitakoa; Gnome mahaigaina aukeratu da eta Mozilla 0.9.8 nabigatzailea eta Evolution 1.0 postarako aplikazioa ere euskaratu dira. Interneten dago hori guztia, jaitsi nahi duen edonorentzat eskuragarri.

Mandrakeren banaketa normalean euskarazko bertsioa ere egongo da, baina Eusko Jaurlaritzak 2.000 CD kaleratuko ditu hil honen inguruan batez ere eskoletan banatzeko. CD horietan, Mandrakeren euskarazko bertsioaz gain, nola erabili azaltzen duten eskuliburuak ere izango dira.
http://www.linux-mandrake.com/en/ftp.php3