Denbora aurrezteko balio duen makina

U. Atxotegi

Lehen mekanizazio konbentzionala ikasten zen, hau da, ikasleak makinak eskuz maneiatzen hasten ziren. Eskuak, aldiz, motz gelditu ziren tresna askoren baliabideak ikusirik, eta zenbakizko kontrolaren teknologiak gizakien eskuak ordezkatu ditu. Izan ere, zenbakizko kontrolarekin langileak programa bat egiten du eta makinak aginduei jarraitzen die. Teknologia-mota horretan, moldeak eta trokelak altzairu bigunean egiten dira eta ondoren altzairu hori tratatu egin behar izaten da gogortu arte. Materiala, beraz, mekanizatu egin behar izaten da, gogortzeko hainbat fase pasatu behar du eta, azkenik, leundu egin behar da. Baina fase horien ondorioz, kostuak anitz igotzen dira eta denbora asko galtzen da.

Geroago, CAM (ordenagailuz lagundutako mekanizazioa) teknologia sortu zen langileari lana erraztu nahian. Sistema horren bidez, ikasleak edo langileak mekanizatu nahi duena ordenagailuz marrazten du eta ordenagailuak programa bat eskaintzen dio zuzenean. CAM teknologiaren baitan estrategia bat baino gehiago dago, besteak beste, lehengo erremintetarako eta makinetarako pentsaturiko sistema edo makina eta material berrietarako prestaturikoa.

Abiadura handiko makina

Antoniano ikastetxeko irakasleak sistema berria erabiltzen ikasten ari dira.

U. Atxotegi

Aipatu hiru teknologia horiei jarraipen bat eman nahian, eta betiere denbora aurrezteko, abiadura handiko makinak sortu dituzte. Sistema berriari esker, zenbakizko kontrolean aipaturiko tratamendu- eta leuntze-faseak desagertu egiten dira. Moldeak eta trokelak, adibidez, altzairu gogorrean egiten dira zuzenean eta ez dute inolako tratamenturik behar izaten. Noski, makina berritzaile horrek baldintza batzuk bete behar ditu: ezin du abiada aldatu eta, bestalde, abiadak ez du produktuaren zehaztasunean inolaz ere eragin behar azkarrago ekoiztu arren. Emaitzak gainerako teknologien bidez lortzen dena bezalakoa izan behar du.

EAEko hainbat ikastetxetan lantzen ari dira teknologia-mota hori, besteak beste, Gasteizen, Arrasaten eta Zarauzko Antoniano Ikastetxe Politeknikoan. Azken ikastetxe horretako irakasle-talde bat teknologia hori erabiltzen ikasten ari da, ondoren beren ikasleek erabil dezaten. Proiektu horretako partaide Iñaki Beobide irakasleak esan digunez, abiada handiko makinen teknologia ikasteko hiru urteko epea ezarri diete beren buruari.

Trebakuntza eta aplikazioak

Eibarko Tekniker zentro teknologikoa mekanizazio-arloan berritzailea den teknologia hori garatzen ari da azken hiru urteetan. Antoniano ikastetxeko irakasleak bertara hurbildu ziren teknologia horretan trebatzeko eta geroztik elkarrekin dihardute lanean.

Antoniano ikastetxeak duela gutxi jaso du makina berritzaile hau.

U. Atxotegi

Dagoeneko amaitu dituzte ikastaroak. Hemendik aurrera, erosi berri dituzten makina eta softwarea ongi erabiltzen ikasi nahi dute; material didaktikoa prestatzeko asmoa ere badute beren ikasleek sistema berria ahalik eta era egokienean barnera dezaten.Aurtengo kurtsoan ez bada hurrengoan, ikasleekin proba bat egin nahiko lukete. Abiada handiko makinen teknologia mekanika-taldeko ikasleen produkzio-atalean irakasteko asmoa dute.

Iñaki Beobideren aburuz, “teknologia-mota hori moldeak eta trokelak mekanizatzen dituzten enpresetan erabiltzen da batik bat”. Horrez gain, estanpazioetan eta burdinoletan ere baliatzen dute. Bestalde, prozesua bera garestiagoa da, baina Beobide irakaslearen iritziz, “aztertu egin behar da zein kasutan erabili eta zeinetan ez”.

Teknologia hori berritzailea denik ezin ukatu. Izenak dioen bezala, denbora aurrezteko balio du eta enpresa anitzi gastuak murrizteko ere balioko die.