Ekosistementzat eta biodibertsitatearentzat nabarmen hobeak dira baso autoktonoak zuhaitz-landaketak baino, basoberritzeko era desberdinak aztertu dituen lan zabal batean ondorioztatu dutenez. Science aldizkarian argitaratu dituzte emaitzak.
Basoberritzeak garrantzitsutzat jotzen dira larrialdi klimatikoari eta haren ondorioei aurre egiteko, bereziki eremu degradatu de soilduetan, eta, bide horretatik, egitasmo asko daude mundu zabalean. Baina basoberritzea nola egiten den, eraginkortasuna desberdina izan liteke; eta horixe aztertu dute lan honetan. Horretarako, 53 herrialdetako 264 azterlan konparatu dituzte, planetako baso-bioma nagusiak kontuan hartuta. Eta ondorioztatu dute baso autoktonoak osaera sinpleagoko zuhaitz-landaketak baino eraginkorragoak direla karbono-metaketan, ur-horniduran, eta, bereziki, lurzoruaren higadurari aurre egiten eta biodibertsitatea ostatatzen. Zuhaitz-landaketak, berriz, hobeak dira egurra ekoizteko.
Etxebeste Aduriz, Egoitz
Elhuyar Zientzia Itsas Biologian eta Animalia Biologian lizentziatua, La Lagunako Unibertsitatean (Tenerife). AZTI-Tecnalian hasi zuen bere ibilbide profesionala, hainbat ikerketa-proiektutan parte hartuz. 2006ko azaroaz geroztik Elhuyar Fundazioko Zientziaren Komunikazioa sailean ari da lanean. Elhuyar Zientzia eta Teknologia aldizkariko erredaktorea eta erredaktore-burua da, eta Zientzia.net webgunearen arduraduna.
