Urtebete geroago, Fukushima gogoan

Argitaratu diren gogoeta eta artikuluen artean, bada bitxikeriarik ere, adibidez, Georgia Teknologia Institutuak egindakoa (Estatu Batuak).

Hain zuzen, duela urtebeteko lurrikararen uhinak audio-fitxategi bihurtu dituzte hango ikertzaileek. Horretarako, sismografoek jasotako seinalearen maiztasuna handitu dute, uhinak gure entzumenak sumatzeko maiztasun-tartean egon daitezen.

Sismological Reseach Letters aldizkarian argitaratu dute emaitza, eta hiru grabaketa jarri dituzte, adibidetzat. Lehenengoa epizentrotik 145 kilometrora jaso zuten; bigarrena, kostaldean, Daiichiko zentralaren eta Tokioren artean; eta hirugarrena, San Andreseko failan (Kalifornia), lurrikarak mugimenduak eragin baitzuen faila hartan.

Georgia Teknologia Institutuko ikertzaileek adierazi dutenez, haien lana baliagarria da beste lurrikara eta dardara batzuen datuak interpretatzeko.