Indonesiako labar-pintura batzuetan egindako azterketa batean ondorioztatu dutenez, litekeena da klima-aldaketaren ondorioz pintura horiek azkarrago hondatzea.
Maros-Pagnkepeko haitzuloetan eta babeslekuetan dauden kolore gorri eta moreko pigmentuekin egindako pinturek 20.000 eta 45.000 urte artean dituzte. Haien artean daude, esaterako, eskuen irudi zaharrenak. Zenbait zantzuk erakusten zuten pinturak hondatzen ari direla, eta, azken hamarkadetan, gero eta azkarrago, gainera; baina ez zegoen argi zergatik.
Orain, pinturak dauden lekuetan arrokaren gainazalean altxatzen hasita dauden printzak aztertu dituzte, eta kaltzio sulfato eta sodio kloruro gatzak aurkitu dituzte. Gatz horiek kristalak sortzen dituzte, eta arroka apurtzen.
Ikertzaileek azaldu dute euri-aldi eta lehorteen arteko tenperatura- eta hezetasun-aldaketak oso aproposak direla gatz-kristalak sortzeko, eta aldaketa horiek areagotzen ari direla klima-aldaketaren ondorioz. Scientific Reports aldizkarian argitaratu dute lana.
Etxebeste Aduriz, Egoitz
Elhuyar Zientzia Itsas Biologian eta Animalia Biologian lizentziatua, La Lagunako Unibertsitatean (Tenerife). AZTI-Tecnalian hasi zuen bere ibilbide profesionala. 2006tik Elhuyarren ari da lanean Kultura Zientifikoaren arloan. Elhuyar aldizkariko erredaktorea eta zuzendarikidea da.
