Txirbil-harroketaren arloko sariak izan dira biak. Kondiak Abiadura eta doitasun handiko mekanizazio-zentroa, P60-V2, proiektua aurkeztu zuen lehiaketara eta "pieza osoaren armoniari, diseinuak azaleratzen duen segurtasun, ergonomia, teknologia eta komunikazioaren arteko orekari" eman diote saria. Bestalde, ONAk "diseinuan oinarritutako estrategia globalari esker, bere produktuaz eta bere komunikazio elementuez baliatuz, enpresa koherente eta berriztatzailearen irudia ematen duelako" jaso du berea.
Hamabi izan dira lehiaketara aurkeztu diren proiektuak; metalaren eraldaketarako proiektuak denak; bederatzi txirbil-harroketaren arloan eta beste hiru deformazioarenean. Deformazioaren arloko saria ez zaio inori eman.
Kondiak mekanizazio-zentroak eta fresatzeko makinak fabrikatzen ditu eta P60-V2 2002an atera duten mekanizazio-zentro berria da. Diseinu sendoko makina, osagaien artekan armonia duena eta barreiadura-sentsaziorik sortzen ez duena. Bestalde, koloreen aukera egiterakoan, egonkortasuna eta produktu teknologikoaren ezaugarriak erakutsi nahi izan dira.
ONAk elektrohigadura-makinak egiten ditu eta, era horretako makinak fabrikatzen dituen Europako Batasuneko lehen enpresa da. Elektrohigadura egiteko eraren arabera, bi motatako makinak egiten dituzte: sarpenaz edo hari bidez lan egiten dutenak. 22 BIEMH honetarako, berrikuntzaren aldeko apustua egin du ONAk, baita emaitza jaso ere.
Enpresa biok aurten egin dituzte 50. urte. Ospatzeko zerbait gehiago dute orain.
Enpresa sarituei buruzko informazio gehiago nahi izanez gero:
http://www.kondia.com eta http://www.ona-electroerosion.com
Lasa Iglesias, Aitziber
STEAM Hezkuntza arloko arduraduna
Industria Ingeniaria, energia-tekniketan espezializatua (UPV/EHU) eta multimedia-ikasketak egina (UOC), Elhuyar Fundazioan dihardu 2002az geroztik, Zientziaren eta Teknologiaren gizarteratze-lanetan. Nagusiki haurrentzako eta gazteentzako proiektuetan ibilia, lehiaketak, aldizkariak eta bestelako proiektuak jarri ditu martxan Elhuyarren. 2006tik 2010era arte, BTEK Teknologiaren Interpretazio Zentroaren proiektu museologikoaren eta museografikoaren koordinatzailea izan da. Gaur egun, museografiaren ardura du Elhuyar Fundazioan, zientzia-zerbitzu espezializatuen eremuan.
Proiektu berrien diseinuaz gain, publiko desberdinei zuzendutako hainbat proiekturen ohiko kolaboratzaile ere bada gaur egun.
