Helios hegazkinaren istripua
2003/07/01 Elhuyar Zientzia
![](images/E030701.jpg)
Azken urteotan garatzen ari den Helios hegazkinak istripua izan du Hawaiko Kauai irlan. 30 minutuko hegaldiaren ostean izan du istripua, NASAkoek arrazoia zein izan den oraindik ez badakite ere.
Eguzki-energiaz baliatuz hegan egingo duten hegazkinen prototipoa da Helios, eta, horretarako, eraginkortasun handiko eguzki-zelulak ditu gainazalean. Lurrarekin talka egin zuenean, sistema berri bat ari zen probatzen, eguzki-energia gorde eta gauez ere hegan egin ahal izateko. Izan ere, energia metatzeko sistema egokia aurkitzea behar-beharrezkoa da hegazkin hauen helburua lortu ahal izateko, bestela argirik gabeko orduetan hegazkinek lur hartu beharko bailukete.
Ikatz-zuntzez eta grafitoz egindako hegazkinak dira eta, hortaz, arin-arinak. 1,080 kilogramoko pisua dute, nahiz eta 75 metro zabal diren. Dagoeneko hegazkin arruntek baino askoz ere altuera handiagoa lortu dute (29.5 km) eta, eguzki-energia metatzeko sistema egokia lortutakoan, hilabete luzez hegan egiteko diseinatu dituzte. Batetik, hegazkin hauek sortzea sateliteak espazioan edukitzea baino merkeagoa delako eta, hortaz, kostu txikiko telekomunikazio-plataforma modura erabili ahal izango direlako. Bestetik, piloturik ez badute ere, Helios hegazkinen ibilbidea Lurretik kontrolatu eta nahi bezala alda daitekeelako.
Irudi gehiago ikusi nahi izanez gero, egin klik hemen.
![](https://elia.eus/static/elhuyar/img/elia_RGB.png)
Gai honi buruzko eduki gehiago
Elhuyarrek garatutako teknologia