Gangesen delta ikus daiteke irudian, munduko deltarik handiena; Asiaren hegoaldean dago, Bangladesh eta India artean. Europako Espazio Agentziaren Envisat sateliteak jasotako datuekin egindako irudia da; zehazki, ASAR deritzon radarrak jasotako datuekin.
Berez, radarrek jasotako informazioarekin ezingo litzateke koloredun irudirik sortu, koloredun irudiak sortzeko espektro ikusgaiko uhinak erabili beharko liratekeelako, eta radarrek irrati-uhinak erabiltzen dituztelako.
ASAR radarrak jasotako irrati-uhinekin, dena den, askotariko konposizioak egin daitezke; adibidez, irudian ageri dena: radarrak uhinak bidali zituen Lurrera, eta Gangesen deltako materialek uhin horiek nola banatu zituzten jaso zuen. Materialek konposizioaren arabera desberdin sakabanatzen dituztenez uhinak, erraz adieraz daitezke gainazaleko aldakortasunak, eta erraz eslei dakioke bakoitzari kolore jakin bat.
Irudia: ESA
Lakar Iraizoz, Oihane
Elhuyar Zientzia Elhuyar Fundazioko Zientziaren Komunikazioa sailean ari da lanean 2006ko urriaz geroztik. Elhuyar Zientzia eta Teknologia aldizkarian ia hilabetero artikuluak argitaratzen ditu, eta Basque Research webguneko arduraduna eta erredaktorea ere bada. Euskal Herrian egiten den ikerketaren berri ematen du Basque Researchek. Biologian lizentziatua da, Leioako EHUn egin zituen ikasketak, eta, Elhuyar Fundazioan baino lehen, Bertiz Jaurerria Parke Naturalean aritu zen lanean, bisitariei harrera egiten eta ingurunea zaintzen.
