Europa gainazal osoa izotz-geruza egonkor batez estalia duen Jupiterren sateliteetako bat da. Zientzialarien esanean, duen errotazio geldoak eta gainazaleko indar magnetikoak erakusten dute izotzaren azpitik ozeanoak egon daitezkeela.
Ezaugarri horiengatik, Eguzki-sisteman bizia izateko aukera gehien dituen tokia dela uste dute zientzialariek. Hori dela eta, Nasa aspalditik dabil hara bidaltzeko misioa prestatzen, eta 2008an Europa inguruko orbitan bueltaka ibiliko den espazio-ontzia bidaltzeko asmoa du.
Baina orain asmo hori ezerezean geratu ahal da, Ilargia eta Planetak Aztertzeko Texasko Institutuko Paul Schenk zientzialariak Nature aldizkarian azaldutakoa baieztatuz gero. Haren esanean, Europako izotz-geruza oso lodia da, 19 eta 25 km bitartekoa. Horrelako geruza batek izugarrizko zailtasunak ekarriko lituzke azpiko ozeanoa aztertzerako orduan.
Elhuyar Zientzia
