Usaimen bikoitza

Estatu Batuetako Stamford-eko Unibertsitateko ikertzaile-talde batek egindako ikerketaren arabera sudur-hobi bakoitzak desberdin usaintzen du. Aspaldian ezagun zen sudur-hobi baten aire-fluxua bestearena baino handiago dela uneoro eta hobiek ordu batzuetako txandatan lan egiten duela.

Ezaugarri horren eragilea sudur-paretan daukagun hantura bat omen da. Ikertzaileek aire-fluxuaren aldaketak usaimenean eraginik zuen jakin nahi zuten eta, horretarako, bi substantziaren nahasteak usainarazi zizkieten zenbait boluntariori: sudur-hobi batetik lehenik eta bestetik ondoren. Nahastearen osagaietako batek oso azkar zeharkatzen ditu sudur-paretak eta segituan heltzen da usaimen-hartzaileetara. Besteak berriz, denbora gehiago behar izaten du.

Fluxuaren arabera nahastearen osagaietako bat bestea baino gehiago barreiatzen zela ikusi zuten ikertzaileek eta, ondorioz, sudur-hobi batetik eta bestetik jasotako usaina desberdina zela. Sudur-hobi bakoitzak, gure begiek eta belarriek egiten duten modura, ingurunearen "irudi" desberdina igortzen dio garunari eta, horrek, usainak zehatzago beriezteko gaitasuna handiagotu egiten du.