Ume jaioberriak, odol-emaile

Saharaz hegoaldeko herrialdeetan, malariaren aurkako ohiko tratamenduekin sendatzen ez diren haurren % 25 anemiagatik hiltzen da. Izan ere, malariaren kasu larrienetan, beharrezkoa da odol-transfusioak egitea anemiari aurre egiteko, eta askotan ez da nahiko odol egoten ospitaleetan.

Ghanako Komfo ospitalean arazo horri irtenbidea aurkitu diote. Ume jaioberrien zilbor-hestea transfusioetan erabiltzeko odol-iturri egokia dela ikusi dute hango ikertzaileek. Nahiz eta zilbor-hestean gelditzen den odol-kantitatea txikia izan, nahikoa da malariak larri jotako ume baten bizia salbatzeko.

Hala, egin beharreko transfusioen % 60an, erditzeko gelan lortutako odola erabiltzen da ospitale horretan. Dena dela, ospitale txikietan teknika hori erabiltzea oso zaila izango dela uste dute sendagile batzuek.