Saguek gaixotasunak usaindu ditzakete

Suitzako Geneva Unibertsitateko neurogenetikari batzuek ikusi dute hainbat karraskarik gaixorik dauden banakoak identifika ditzaketela usaimenaren bitartez. Saguen genoma aztertuta, ezagutzen ez zituzten bost usain-errezeptore aurkitu dituzte, eta ikusi dute errezeptore horiek immunitate-sistemako zelulek dituzten errezeptoreen familiakoak direla. Errezeptore horien bitartez, immunitate-sistemako zelulek odoleko patogenoek isurtzen dituzten konposatuei antzematen diete, eta zer zelulari egin behar dieten eraso jakiten dute. Era berean, gaixoek isurtzen dituztenak ere usaintzen dituzte karraskariek, eta haiengandik urruntzen dira.