Sagarraren kolorea kontrolatzen duen genea aurkitu dute Australiako ikertzaile batzuek. Hain zuzen ere, sagarrari kolore gorria ematen dioten antozianina izeneko konposatuak kontrolatzen ditu gene horrek.
Genea aurkitzeko, kontuan izan dute argiarekin aktibatzen dela; izan ere, sagarrak eguzki-argiaren eraginez gorritzen dira (ilunpean edo itzal itxian hazten diren sagarrak ez dira gorritzen). Bestalde, sagar-barietate bat baino gehiago aztertu zituzten: sagar-barietate berdeen eta gorrien antozianina-produkzioari erreparatu zioten genea aurkitzeko.
Genearen aurkitzaileen esanean, aurrerantzean sagarraren kolorea kontrolpean izangodute, eta ‘itxura oneko’ sagarrak ekoitziko dituzte. Kontsumitzaileak begiz aukeratzen du sagarra eta itxura erakargarria izatea komeni zaie sagarren ekoizle eta saltzaileei. Dena dela, sagarrari gorria ematen dioten antozianinak antioxidatzaileak dira, eta, beraz, osasungarriak.
Rementeria Argote, Nagore
Elhuyar Zientziaren Komunikazioa
Elhuyar Zientzia eta Teknologia aldizkarian erredaktore lanak egiteaz gain, irratian ere aritu izan da: aurkezle gisa egin zituen hainbat urte Euskadi Irratiko Norteko Ferrokarrillean Guillermo Roarekin batera. Gaur egun Teknopolis telebista-saioko erredaktorea da, ETBrentzat Elhuyar Fundazioak ekoizten duen saioan.
