Muskerra eta tenperatura

Ipar Amerikako Arizonako basamortuan Urosaurus ornatus izeneko musker-espeziea bizi da, baina ez da musker arrunta. Tenperaturak gora egiten duenean, musker arren larruazalaren kolorea aldatu egiten da. Goizean berde argia da azaleko kolorea, baina tenperatura 30¾ zentigradura igotzen denean urdin turkesa bihurtzen da. Ordu beroenetan, berriz, kolorea urdin kobaltoa da.

Urosaurus ornatus muskerraren kolore-aldaketa.

Estatu Batuetako Maryland-en Hood College-n ari den Randall Morrison herpetologoak aztertu ditu narrasti txiki hauek, fenomenoa ulertu nahian. Azaleko kolorea bertako pigmentu-zelulek beroarekiko duten erreakzioagatik aldatzen da. Zelula iridoforo deitutako hauek hazi eta zabaldu egiten dira tenperatura igo ahala, bertako kristalen kokapena aldatu egiten delarik. Ondorioz, azalak islatzen dituen argi-izpien uhin-luzera aldatu egiten da urdin aldera.

Muskerrak ez du kontrolatzen termometro bizidun bihurtzen duen ezaugarri psikologiko eta optiko hau eta energi gastua eragiten dio. Dena den, muskerrak kolore-aldaketak direla eta bere etekina ateratzen du. Kolore argiena duenean harrapariek ikustea zailagoa da eta urdintzen denean emeen inguruan nabarmendu eta lehiakideak etsiarazten ditu.