Mobius-en bandaren forma iragartzeko ekuazioa

Mobius-en banda bat nola egin daitekeen erakusten du irudiak. Laukizuzen luze bat bihurritu, eta muturrak lotu besterik ez da egin behar alde bakarreko banda bat lortzeko, Mobius-en banda. Oso geometria ezaguna da matematikarientzat, eta oso erabilia teknologiaren —eta artearen— munduan. Baina, orain arte, matematikariek ezin zuten eredu matematiko baten bitartez iragarri nolako itxura hartuko zuen Mobius-en bandak hiru dimentsiotan.

Londresko UCL Unibertsitateko bi matematikarik lortu dute. Duela hogei urte prestatutako ekuazio batzuei heldu, eta problema matematikoa ebazteari ekin diote. Eta aurkitu dute Mobius-en bandaren hiru dimentsioko forma hasierako laukizuzenaren luzeraren eta zabaleraren araberakoa dela. Eta, noski, forma hori iragartzeko ekuazio zehatza lortu dute. Ia ehun urte zuen problema klasiko bat ebatzi dute.