Mikroegitura funtzionalak zehaztasun mikrometrikoz sortzeko teknika berritzaile bat garatu dute

Hiru dimentsioko mikroegiturak zehaztasun mikrometrikoarekin fabrikatzeko teknika berritzaile bat garatu dute EHUko ikertzaile batzuek, hutsaren bidezko litografian oinarrituta. ACS Applied Materials & Interfaces aldizkarian aurkeztu dute teknika.

Microfluidics Cluster taldeko ikertzaileek garatu duten teknikari esker, substratu lau batean giza ile bat baino meheagoak diren mikroegiturak sor daitezke, mikrotxip elektronikoak fabrikatzean erabiltzen den fotolitografiaren antzeko bereizmena lortuz. Molde malguak eta presio negatiboa (hutsa) erabiliz, material likido edo gelifikatuak, hala nola nanopartikulak, gel sentikorrak eta polimero funtzionalak, 25 mikra baino txikiagoko zehaztasun batekin molda daitezke, hiru dimentsioko forma konplexuak eta eraginkorrak lortuz, pauso bakar batean kopiatu daitezkeenak.

Gainera, teknika horri esker maila funtzionalean ezberdinak diren materialak substratu bakar batean integratu daitezke, bereizmen mikrometrikoarekin. Horrek aukera ematen du funtzio anitzeko gai pertsonalizatuak diseinatzeko eta fabrikatzeko, zehaztasuna eta errepikagarritasuna galdu gabe.

Ohiko metodoekin ez bezala, hala nola fotolitografia edo 3D-inprimaketa, hutsaren bidezko litografian bereizmen handia, materialen erabileraren moldakortasuna eta eragiketen erraztasuna elkartzen dira, ekipo garesti edo prozesu konplexuen beharrik gabe.

Metodo berri horrek aplikazio ugaritarako aukera eman dezake, hala nola sentsore kimiko eta biologiko miniaturizatuak, osasunaren arlorako, ingurumenarenerako eta industriarako; plataformen bidezko kultibo zelular aurreratuak, mikroingurune kontrolatuetan ikertu ahal izateko; nanoteknologia biomedikoan urrezko eta polimero eroalezko nanopartikulen ereduak sortzeko; edo diagnostiko azkarrerako gailu eramangarriak egiteko.