Albo-ondorioak botikak gibelean metabolizatzean sortzen diren metabolitoek eragindakoak izan ohi dira. Horregatik, botikak komertzializatzeko gainditu beharreko entseguetan gibeleko metabolitoen toxikotasuna aztertzen da. Bada, laborategiko animaliak erabili beharrean entseguak saio-hodian egiteko aukera ematen du Biomimiks izeneko gibel kimiosintetikoak.
Ez dute gibel oso bat sintetizatu, entzima-talde baten baliokidea baizik. Biomimiks botiken metabolismoan eragiten duen gibeleko zitokromo P450 entzima-taldearen egitura eta funtzioaren pareko sintetikoa da. Gibel kimiosintetiko horrekin metabolitoen perfil zehatza egiten da; azkar, gainera, animaliekin egindako entseguekin alderatzen bada.
Estatu Batuetako Kimika Elkartearen bilera batean aurkeztu dute gibel kimiosintetikoa, eta botika gehiagorekin frogatzen jarraitu behar duten arren, zenbait kasutan animaliekin egindako entseguak ordezkatuko dituen itxaropena dute, besteak beste, aldi berean hartzen diren botiken interakzioak ikertzeko baliabide egokia izan daitekeelako.
Nagore Rementeria Argote
Elhuyar Zientzia
Elhuyar Zientzia eta Teknologia aldizkarian erredaktore lanak egiteaz gain, irratian ere aritu izan da: aurkezle gisa egin zituen hainbat urte Euskadi Irratiko Norteko Ferrokarrillean Guillermo Roarekin batera. Gaur egun Teknopolis telebista-saioko erredaktorea da, ETBrentzat Elhuyar Fundazioak ekoizten duen saioan.
