Izotz-mota berria

(Argazkia: AJHD)

Muturreko kondizioetan urak konposatu exotikoak era litzakeelako ustea aspaldidanik egon da zientzialarien baitan. Bada, uretik abiatuz hidrogenoa lortu eta gordetzeko modu berriak ikertzen ari zirela, izotz-mota berri bat aurkitu dute Washingtongo Carnegie erakundean. Hidrogeno eta oxigeno molekularrez osatua dagoen energia handiko solido kristalinoa da, orain arte ezagutzen ziren 17 izotz-motetatik desberdina.

Izotz hau sortzeko, ura diamantezko ingude baten bidez oso presio altuan jarri zuten eta ondoren energia altuko X izpiez bonbardatu. Ondorioz, molekulak atomotan banatu ziren eta O₂-aren eta H₂-aren konbinazio gaurdaino ezezagunean berrantolatu. Erabilitako X izpien energia-mailan ei dago gakoa, energia gehiagokoak edo gutxiagokoak erabiliz gero ez baitziratekeen emaitza honetara iritsiko. Konposatu hau eratzeko behar den energia-tartea estua da, gainera, eta hau izan liteke, hain zuzen ere, orain arte izotz-mota hau aurkitu ez izanaren arrazoia.