Hasieran ere izarrak binaka

Unibertsoan sortu ziren lehenengo izarretako batzuk izar-sistema binarioak izan bide ziren, Estatu Batuetako Stanford Unibertsitateko eta Michigan Estatu Unibertsitateko ikertzaile batzuek ondorioztatu dutenez.

Sortu berritan unibertsoan ustez zeuden kondizioak simulatu dituzte, eta aztertu dute nolako eboluzioa izan zuten unibertso hartako gas-hodeiek; alegia, izarren aurrekariek. Aurretik egindako simulazioek adierazten zuten garapeneko lehengo faseetan unibertsoko izarrak bakarka sortu zirela, hasierako gas-hodeiak kolapsatzearekin batera.

Ikerketa berriak, ordea, iradokitzen du gas-hodei bakarretik bi izarreko sistemak ere era zitezkeela. Irudiko ilustrazioan, izar bana sortuko duten bi nukleo ikus daitezke gas-hodei batean.

Irudia: © Science/AAAS